Саботажа на железничката линија Варшава–Лублин: Експлозивна направа го оштетила колосекот

Железничката линија што ја поврзува Варшава со Лублин и понатаму со Украина била крената во воздух во неделата, а полскиот премиер Доналд Туск потврди дека се работи за „акт на саботажа“.

Сообраќајот беше запрен откако машиновозач забележал оштетување на колосекот и ги предупредил останатите возови. Првичните сомневања за намерна штета се покажале точни.

„Потврдени се најлошите сомневања. Експлозивна направа уништи дел од пругата кај селото Мика. Оштетувања се пронајдени и поблиску до Лублин“, објави Туск на Икс, дополнувајќи дека инцидентот претставува директен напад врз безбедноста на државата и линија од клучно значење за помошта кон Украина.

Иако Туск не посочи конкретен сторител, инцидентот индиректно го поврза со руската агресија врз Украина. Заменик-министерот за внатрешни работи Мачеј Душчик повика на претпазливост, но не ја исклучи можноста за руско вмешување.

Оштетениот дел од пругата и натаму е затворен, но сообраќајот продолжува по алтернативни рути. Полската армија ќе го провери целиот 120-километарски дел што води кон украинската граница.

Откако започна целосната руска инвазија во 2022 година, Полска регистрира пораст на случаи на шпионажа, саботажа и напади врз критична инфраструктура. Во последните месеци беа уапсени повеќе лица под сомнение за вакви активности.

Началникот на Генералштабот, генерал Виеслав Кукула, предупреди дека противникот се обидува да создаде недоверба во институциите со цел да подготви терен за можно понатамошно дестабилизирање.