Телеграф: Корупциски скандал во Украина може да го загрози владеењето на Зеленски
Голем корупциски скандал што ја потресе Украина би можел да го означи крајот на владеењето на претседателот Володимир Зеленски, објави британскиот Телеграф.
Според информациите, Националното антикорупциско биро на Украина (НАБУ) разоткрило шема во која „високо рангирана криминална организација“ наводно се обидела да пренасочи околу 100 милиони долари од енергетскиот сектор — во време кога земјата секојдневно се соочува со руски напади врз инфраструктурата.
Во центарот на скандалот се најде бизнисменот Тимур Миндич, ко-сопственик на медиумската куќа „Квартал 95“, основана од самиот Зеленски. Министерот за правда Герман Галушченко е суспендиран поради можната вмешаност, а министерката за енергетика Свитлана Гринчук поднесе оставка — наводно на барање на претседателот. И двајцата ги негираат обвиненијата.
И покрај тоа што истрагата го допира неговиот блиски круг, Зеленски јавно ја поддржа работата на антикорупциските институции, нагласувајќи дека „ефикасните антикорупциски мерки се неопходни“ и дека „сите виновни ќе мора да одговараат“.
Аналитичарите сметаат дека овој став претставува пресврт по неговите јулски обиди да ги стави антикорупциските тела под контрола на претседателската администрација. Но, случајот може да предизвика сериозни политички последици, бидејќи го доведува во прашање угледот на Зеленски во воено време и неговите шанси за реизбор.
Врската меѓу Зеленски и Миндич повторно е под лупа. Според претходни изјави на олигархот Игор Коломојски, токму Миндич го запознал Зеленски со него — партнерство кое беше клучно за претседателската кампања во 2019 година. Коломојски, инаку уапсен за перење пари во 2023 година, претходно му помогнал финансиски на Зеленски.
Наводите дека Миндич имал лесен пристап до претседателската администрација — вклучително и фактот што Зеленски користел негов блиндиран автомобил и дека Миндич се среќавал со шефот на кабинетот Андрије Јермак — дополнително го потхрануваат сомнежот за влијанието на неговиот круг.
Иако нема докази дека Зеленски лично бил вмешан во корупција, скандалот го става под сериозен политички притисок. Според Телеграф, со растечките сомнежи и приближувањето на нови воени и политички предизвици, „гласините за крајот на неговото владеење стануваат сè погласни“.