ИЕА: Глобалната побарувачка за нафта и гас ќе расте до 2050 година

Глобалната побарувачка за нафта и гас веројатно ќе продолжи да расте сè до 2050 година, соопшти денеска Меѓународната агенција за енергија (ИЕА), отстапувајќи од своите претходни прогнози за забрзан премин кон почисти извори на енергија. Според новите проценки, светот најверојатно нема да ги исполни климатските цели поставени со Парискиот договор.

ИЕА, која е водечка западна институција за мониторинг на енергетската безбедност, во последните години се соочува со притисоци, особено од САД, поради нејзиниот акцент на зелените политики. Американскиот претседател Доналд Трамп повеќепати ги повика домашните енергетски компании да го зголемат производството на нафта и гас, спротивно на претходните препораки на агенцијата.

Во времето на администрацијата на Џо Бајден, ИЕА прогнозираше дека глобалната побарувачка за нафта ќе го достигне врвот во текот на оваа деценија и дека нови инвестиции во фосилни горива не се неопходни, доколку светот навистина сака да ја постигне целта за ограничување на глобалното затоплување.

Сегашниот американски министер за енергетика, Крис Рајт, ги нарече претходните проекции на ИЕА „глупости“, тврдејќи дека реалниот пазарен тренд покажува спротивно.

ИЕА е финансирана од земјите-членки, а САД се најголем придонесувач. Нејзините анализи и сценарија се користат како основа за енергетските политики на бројни влади и корпорации во светот.

Во најновиот Светски енергетски извештај, агенцијата предвидува дека според тековните политики, до 2050 година побарувачката за нафта ќе достигне 113 милиони барели дневно, што претставува зголемување од околу 13 проценти во однос на потрошувачката во 2024 година.

Според експертите, оваа проекција укажува дека фосилните горива ќе останат доминантни во глобалната енергетска структура и во наредните децении, и покрај интензивните напори за енергетска транзиција.