Германска градоначалничка нападната со нож – Ирис Шталцер се бори за живот
Новoизбраната градоначалничка на германскиот град Хердек, во покраината Северна Рајна-Вестфалија, Ирис Шталцер (57), е во критична состојба по напад со нож пред нејзиниот стан, јавуваат германските медиуми.
Според информациите на Дојче Веле, политичарката од Социјалдемократската партија (СПД) е пронајдена со повеќе убодни рани, а лекарите се борат за нејзиниот живот.
Инцидентот се случил околу пладне, кога Шталцер била нападната пред влезот на зградата. Таа успеала да се одвлече до својот стан, каде што се срушила. Итните служби ја пронашле во животно-загрозувачка состојба и веднаш ја пренеле во болница.
Во моментот на нападот, во станот биле нејзините посвоени деца – 15-годишно момче и 17-годишна девојка. Тие веднаш ја повикале полицијата.
Според весникот Билд, полицијата го привела 15-годишниот син на Шталцер за да спречи можно прикривање или уништување на докази. Момчето било врзано со лисици и спроведено во полициско возило облечено во судско одело.
Полицијата наведува дека тинејџерот изјавил оти неговата мајка била нападната од неколку непознати лица на улица.
Во тек е обемна полициска истрага и потрага по сторителот, а на местото на нападот се прибираат траги и материјални докази. Засега не е познат мотивот ниту идентитетот на напаѓачот.
Ирис Шталцер неодамна ја презеде функцијата градоначалник на Хердек, откако во вториот круг од изборите на 28 септември освои 52,2 проценти од гласовите, победувајќи го кандидатот на Христијанско-демократската унија (ЦДУ), Фабијан Конрад Хас.
Таа е адвокат специјализиран за трудово право, мајка на две деца и долги години активна во локалната политика на овој град со околу 20.000 жители.
Реакции од германските лидери
Германскиот канцелар Фридрих Мерц (ЦДУ) изрази шок и загриженост по нападот врз градоначалничката.
„Добивме вест за гнасниот чин од Хердек. Ова мора брзо да се разјасни. Стравуваме за животот на назначената градоначалничка и се надеваме на нејзино целосно закрепнување. Моите мисли се со нејзиното семејство и најблиските“, напиша Мерц на платформата Икс (поранешен Твитер).