Крива Паланка објави повик за новогодишен базар: Куќарки на Градскиот плоштад од 1 декември до 10 јануари

Општина Крива Паланка го објави јавниот повик за пријавување интерес за изнајмување новогодишни куќарки во рамки на новогодишниот базар, кој ќе трае повеќе од еден месец — од 1 декември 2026 до 10 јануари 2027 година.

Градскиот плоштад ќе биде претворен во празничен простор со понуда на вкусови, уникатни подароци и содржини за дружење, а локалните бизниси и креативци ќе имаат можност да ја збогатат новогодишната атмосфера.

Што може да се нуди во куќарките?

Повикот е отворен за широк спектар на содржини соодветни на зимскиот и празничниот амбиент:

• Топли пијалаци — кафе, чај, топло чоколадо и варено вино
• Слатки задоволства — палачинки, вафли, мини крофни, медењаци и новогодишни колачиња
• Храна и домашни специјалитети — колбаси, хот-дог, скара, сендвичи, печива, зелник и мекици
• Зимски вкусови — печени костени, пуканки и јаткасти плодови
• Локални производи — мед, слатко, џемови и чаеви
• Подароци и украси — ракотворби, сувенири, накит, свеќи и новогодишни декорации
• Детска понуда — играчки, сликовници, креативни сетови и новогодишни пакетчиња

Добредојдени се и други предлози за содржини соодветни на новогодишниот базар, кои ќе придонесат за разновидна и привлечна празнична понуда, наведуваат од Општината.

Како да се пријавите?

Пријавувањето интерес се врши во Одделението за урбанизам и заштита на животната средина при Општина Крива Паланка. Заинтересираните треба да наведат:

• име на фирмата или излагачот
• податоци за контакт
• краток опис на производите и содржините што ги нудат

Општината ги охрабрува локалните бизниси, производители и креативци да ја искористат можноста за промоција и продажба на своите производи и да станат дел од празничната приказна во срцето на Крива Паланка.