Македонија во „портокалова фаза“: Екстремен ризик од пожари низ целата земја, активни шест големи жаришта
Речиси целата територија на Македонија се наоѓа во зона со висок ризик од пожари, алармираат од Центарот за управување со кризи (ЦУК). Поради екстремно високите температури, метеоролошкиот индекс на пожар е обоен во портокалово за најголемиот дел од државата, што укажува на критичен степен на опасност од појава и брзо ширење на огнот на отворен простор.
Единствен исклучок со нешто понизок, жолт индекс, се регионите на Шар Планина, Охрид и Ресен.
Драматична битка со огнот кај прилепското село Чаниште
Најкритично во изминатите 24 часа беше кај селото Чаниште, Прилепско. Огнената стихија за кратко време влезе меѓу куќите, зафаќајќи најмалку еден станбен и еден помошен објект.
„Прилепските пожарникари пристигнаа во моментот кога огнот веќе навлегуваше во селото. Со брза реакција е спречена поголема катастрофа“, изјави Стојанче Ангелов, директор на ЦУК. Во интервенцијата учествуваа и доброволци од друштвото „Архангел“ од Битола. Две жителки кои вдишале чад биле медицински згрижени и се во стабилна состојба.
Моментална состојба: Шест активни пожари
Во изминатото деноноќие се евидентирани вкупно 29 пожари на отворен простор. До овој момент, активни се шест жаришта:
- Студеничани: кај селата Моране, Вртекица и Рамни Габер.
- Македонски Брод: реонот на Видуш и селата Драгов Дол, Локвица и Девич.
- Велес и Зелениково: потегот меѓу селата С’лп, Карабуниште и Бузалково.
- Јегуновце и Сарај: кај селата Копанце и Бојане.
- Прилеп: селото Чаниште (сè уште активно).
- Долнени: кај селата Вранче и Бело Поле.
Под контрола е ставен пожарот на депонијата во Делчево, додека 22 други помали пожари се целосно локализирани.
Прогноза: Пеколни температури над 40 степени го зголемуваат ризикот
Од Управата за хидрометеоролошки работи (УХМР) предупредуваат дека вистинскиот топлотен бран доаѓа од четврток. За време на викендот се очекуваат температури кои на повеќе места ќе надминат 40 степени Целзиусови. Овие услови, во комбинација со најавената нестабилност и засилен ветер, го прават теренот исклучително подложен на пожари.
Од ЦУК и Дирекцијата за заштита и спасување апелираат до граѓаните за максимална одговорност. Строго е забрането палење оган на отворено, а секое сомнително чадење треба веднаш да се пријави на бројот 112.