ПАД НА ДОЛАРОТ: Координирана интервенција на глобалните сили го спасува јенот

Американскиот долар претрпе сериозен удар на светските девизни пазари изминатава недела, забележувајќи го најголемиот неделен пад од април наваму. Главната причина за ваквиот тренд е стравот од голема, координирана меѓународна интервенција за спас на јапонскиот јен, кој претходно потона на најниско ниво во последните 40 години.

Индексот на доларот, кој ја мери неговата вредност во однос на кошничка од шесте најзначајни светски валути, падна за 1,63 проценти, спуштајќи се на 99.802 поени. Наспроти ова, еврото зајакна за 1,38 проценти, достигнувајќи вредност од 1,1527 долари.

ФЕД ги разочара трговците, јенот во офанзива

Централната банка на САД (ФЕД) одлучи да ги задржи каматните стапки во опсег од 3,5 до 3,75 проценти. Иако тројца членови на Советот бараа зголемување, новиот претседател Кевин Ворш не даде јасни сигнали за идно затегнување на монетарната политика. Оваа воздржаност на ФЕД предизвика скептицизам кај инвеститорите во однос на борбата против инфлацијата, што дополнително ја ослабна позицијата на американската валута.

Од друга страна, јапонскиот јен забележа спектакуларен раст. Доларот во однос на јенот потона за 3,82 проценти, со што цената на американската валута се спушти на 157,57 јени. Овој пресврт уследи по директната интервенција на јапонските власти, поддржана од Јужна Кореја.

Ретка координирана акција: САД, Јапонија и Јужна Кореја против пазарната волатилност

Дека ситуацијата е сериозна, потврдуваат и најавите од Вашингтон. Министерството за финансии на САД ги известило водечките банки да се подготват за можна интервенција на пазарот во поддршка на јенот – потег што не е виден од 2011 година.

Американскиот министер за финансии, Скот Бесант, јавно порача дека јенот е „многу потценет“ и дека прекумерните пазарни осцилации не се здрави за глобалната економија.
„Јапонија спроведува силни мерки за зајакнување на економијата, а вредноста на јенот во моментов значително отскокнува од рамнотежната цена“, истакна Бесант.

Последен пат земјите од Г7 координирано интервенираа на пазарот во 2011 година, за да го стабилизираат девизниот курс по катастрофалниот земјотрес и цунамито што ја погодија Јапонија. Сегашниот развој на настаните сугерира дека големите економски сили се повторно подготвени за заедничко делување за да се спречи натамошна дестабилизација на финансиските пазари.