Ердоган Сарач во Грција на средба со раководството на партијата DEB

Претседателот на Движењето за национално единство на Турците (ДНЕТ), Ердоган Сарач, оствари значајна работна средба со претседателката на Партијата за пријателство, еднаквост и мир (DEB), Чигдем Асафоглу, во Комотини, Грција. На средбата се дискутираше за прашања од заеднички интерес за турските заедници во регионот.

Сарач и Асафоглу разменија мислења за моменталните предизвици и ја потенцираа неопходноста од континуирана соработка. Ердоган Сарач истакна дека оваа посета е во духот на долгогодишното пријателство и заедничките вредности.

„Се надеваме дека оваа средба ќе придонесе за зајакнување на соработката врз основа на пријателството, солидарноста и демократијата. Нашата заедничка цел останува посветеноста кон заштитата на правата и стекнатите придобивки на турската заедница во Западна Тракија“, изјави Сарач по средбата.

Посетата има и емотивна тежина, со оглед на тоа што Ердоган Сарач беше близок пријател со основачот на партијата DEB, покојниот д-р Садик Ахмет, чие наследство и денес претставува столб на политичкото дејствување на Турците во овој дел на Грција.

Двајцата лидери потврдија дека дијалогот меѓу организациите на Турците во Македонија и Грција ќе продолжи да се развива во насока на унапредување на положбата на нивните заедници и негување на добрососедските односи.