ЦРН БИЛТЕН: Пијан и без дозвола излетал од пат кај Зрновци, уапсен измамник во Кавадарци кој „лапнал“ 9.000 евра за пасош

Полицискиот билтен за изминатото деноноќие бележи тешка сообраќајна несреќа предизвикана од несовесен возач во виничко, како и филмско апсење на измамник на градскиот плоштад во Кавадарци кој со месеци изнудувал пари од кумановка.

Трагедија кај Зрновци: Со 1,69 промили алкохол и без дозвола пратил пријател во болница

Дваесет и четиригодишен жител на виничкото село Градец е лишен од слобода откако предизвикал тешка сообраќајна несреќа на регионалниот пат Грдовци–Зрновци. Несреќата се случила вчера рано наутро, околу 03:30 часот, кога возачот Д.Н., управувајќи „Опел“, изгубил контрола и излетал од коловозот.

Полицискиот увид открил шокантни детали: возачот не само што немал возачка дозвола, туку управувал под силно дејство на алкохол, при што му биле измерени дури 1,69 промили. Во несреќата со тешки телесни повреди се здобил сопатникот С.С. (28), додека возачот и уште еден сопатник поминале со полесни повреди. По насоки на јавен обвинител, младиот возач е задржан во притвор и против него ќе биде поднесена кривична пријава.

Филмско апсење во Кавадарци: Ветената услуга за пасош „тешка“ 9.000 евра

Полицијата во Кавадарци вчера го лиши од слобода 32-годишниот М.Д. од овој град, веднаш откако од 50-годишна кумановка зел 2.000 евра. Апсењето на градскиот плоштад било резултат на претходна полициска заседа и криминалистичко-техничка обработка на парите.

Жртвата пријавила дека измамникот првично и ветил посредување за странски пасош за сума од 400 евра. Меѓувреме, тој постојано измислувал нови трошоци и барал дополнителни средства, со што за кратко време успеал да изнуди вкупно 9.000 евра.

Откако бил приведен, М.Д. во присуство на јавен обвинител во целост го признал делото. Против него ќе биде поднесена кривична пријава за „измама“, согласно член 247 од Кривичниот законик.