ЛДП ПРЕД НАПУШТАЊЕ НА РАБОТНАТА ГРУПА ЗА ИЗБОРНИ РЕФОРМИ: „Нема да бидеме декор на монополот на големите партии“
Либерално-демократската партија (ЛДП) се закани со повлекување од работната група за измени на Изборниот законик. Од партијата алармираат дека процесот, наместо кон демократизација, се движи кон зацврстување на политичкиот монопол на најголемите субјекти преку „пазарења зад затворени врати“.
Членот на Извршниот одбор на ЛДП, Дејанчо Цветановски, денеска изјави дека партијата нема намера да служи како демократски параван за решенија кои им одговараат исклучиво на големите партии, додека суштинските барања на граѓаните се игнорираат.
Една изборна единица и отворени листи – клучни точки на сопнување
Според ЛДП, најголемите политички сили вешто го избегнуваат дијалогот за воведување една изборна единица со отворени листи, модел кој би овозможил гласот на секој граѓанин да тежи исто и би поттикнал избор на личности со интегритет наместо „партиски послушници“.
„Сведоци сме на парадокс – иако декларативно се согласуваат со една изборна единица, големите партии подмолно предлагаат неразумно висок изборен праг. Ова не е реформа, туку обид за елиминација на помалите партии и целосно затворање на системот за нови и прогресивни идеи“, истакна Цветановски.
Тој беше дециден: доколку големите партии инсистираат на законик по сопствена мерка, ќе мора тоа да го направат без поддршката на ЛДП и да се соочат со судот на јавноста.
Министерство за правда: Усогласувањето продолжува според препораките на ОБСЕ
Веднаш по острите критики од ЛДП, со соопштение излезе Министерството за правда, информирајќи дека денеска се одржала седмата седница на работната група. Од ресорот тврдат дека процесот е инклузивен и во него се разгледуваат предлози од сите релевантни чинители – институции, партии и граѓански организации.
„Дискусијата е насочена кон зајакнување на транспарентноста и интегритетот на изборите, во согласност со препораките на ОБСЕ/ОДИХР“, велат од Министерството.
Следниот состанок на работната група е закажан за 12 јуни, кога се очекува финализирање на текстот. Останува неизвесно дали дотогаш ќе се најде компромис за изборниот модел или работната група ќе остане без еден од своите долгогодишни конструктивни партнери.