РЕВИЗИЈА ВО ИЈЗ: Доцнење на клучни здравствени извештаи и хаос во евиденцијата на вакцините
Државниот завод за ревизија (ДЗР) во својот последен извештај за работата на Институтот за јавно здравје (ИЈЗ) утврди низа системски пропусти, меѓу кои и неоправдано доцнење во изготвувањето на стратешките документи за јавното здравје за 2024 година. Наместо во тековната година, клучните анализи за заразни болести, влијанието на аерозагадувањето и употребата на дроги биле финализирани дури во 2025 година, со што, според ревизорите, податоците ја изгубиле својата актуелност и употребна вредност.
Загрозено планирање на здравствените политики
Ревизорите предупредуваат дека нецелосната реализација на програмските активности и недостигот на навремени податоци директно ја попречуваат државата во планирањето на ефикасни здравствени стратегии. ИЈЗ, иако законски обврзан да води национални регистри и да предлага мерки за заштита на населението, потфрлил во низа законски надлежности.
Дополнително, ревизијата открила дека медицинска опрема набавена со јавни пари стои неискористена, а евидентирани се и слабости во процесите на јавни набавки, како и неправилности при исплатата на плати и ангажманот на лица со договор на дело.
Вакцини надвор од сметководствената евиденција
Еден од најсериозните наоди се однесува на управувањето со вакцините за задолжителна имунизација. Иако тие се евидентираат во електронскиот систем „Мој термин“, ревизорите утврдиле дека вакцините воопшто не биле внесени во деловните книги на Институтот. Вакцините пристигнувале само со податоци за количината, но без нивната парична вредност, со што била оневозможена прецизна материјална и сметководствена контрола врз овие скапи ресурси.
Ненаплатени долгови од над 18 милиони денари
Финансиското работење на ИЈЗ е под знак прашалник и поради лошото менаџирање со побарувањата. Ревизијата нотира дека за сума од дури 18,2 милиони денари, долг кој е постар од три години, раководството не презело никакви мерки за наплата. Ова создава неизвесност дали овие средства на граѓаните воопшто некогаш ќе бидат вратени во буџетот.
Државниот завод за ревизија упати вкупно 15 препораки до менаџментот на ИЈЗ. Со нив се бара итно воспоставување строга контрола врз јавните средства, редовно ажурирање на здравствените регистри и целосно интегрирање на набавките на вакцини во финансиската евиденција на институцијата.