Израел Кац: Армијата е подготвена да го врати Иран во „камено доба“, се чека само одобрение од Трамп

Израелскиот министер за одбрана, Израел Кац, денеска упати остра воена закана до Техеран, нагласувајќи дека израелските одбранбени сили (ИДФ) се целосно подготвени за масовна офанзива. Кац истакна дека извршувањето на планот за целосно онеспособување на Иран зависи единствено од „зеленото светло“ на американскиот претседател Доналд Трамп.

Според израелскиот министер, воените цели се веќе прецизно дефинирани, а армијата е во состојба на највисока борбена готовност, како во офанзивен, така и во одбранбен сегмент.

„Подготвени сме да го вратиме Иран во камено доба. Нашата армија ги има одредено сите цели и чекаме сигнал од Соединетите Американски Држави за почеток на операцијата“, изјави Кац.

Директен удар врз династијата Хамнеи

Министерот Кац беше дециден дека примарна цел на евентуалната нова офанзива е елиминација на „династијата Хамнеи“. Фокусот е насочен кон Моџтаба Хамнеи, кој неодамна беше назначен за наследник на врховниот лидер на Иран.

Оваа изјава доаѓа по ескалацијата на конфликтот и претходната израелско-американска воена операција во која беше елиминиран дотогашниот врховен лидер на Исламската Република, ајатолахот Али Хамнеи. Израелскиот државен врв смета дека само со целосно отстранување на политичко-религиозната структура на власт во Техеран може да се постигне долгорочна безбедност за регионот.

Меѓународната јавност со големо внимание ги следи натамошните чекори на Вашингтон, имајќи предвид дека одлуката на претседателот Трамп би можела да ја преобликува геополитичката мапа на Блискиот Исток и да воведе нов, уште порадикален бран на воени дејствија во регионот.