Одложено зонското паркирање во Реонски Центар по притисокот на граѓаните од Ново Лисиче

ЈП Градски паркинг Скопје соопшти дека воведувањето на зонското паркирање во Реонски Центар, планирано за 1 април, е времено одложено до создавање услови за истовремено воведување и во Ново Лисиче. Одлуката доаѓа по интензивен притисок и најава за протести од жителите на Ново Лисиче.

Повлекување пред притисокот на граѓаните

Општина Аеродром и Град Скопје, соочени со реакциите и најавите за протести од жителите на Ново Лисиче, се повлекоа од намерата да започнат со зонско паркирање во зоната Д12 – Реонски Центар почнувајќи од утре.

Од ЈП Градски паркинг информираат дека одлуката е донесена „по насоки од Град Скопје и Општина Аеродром и во интерес на граѓаните и нивното барање за одложување”.

Паралелно воведување во мај

Според соопштението, одложувањето подразбира:

• Целосна усогласеност на сообраќајниот проект за зонско паркирање за новата зона Д11 – Ново Лисиче
• Поставување на соодветна вертикална и хоризонтална сигнализација
• Паралелна имплементација во двете зони без прелевање на проблемот

„Целта е имплементацијата на зонското паркирање во овој дел од градот да биде комплетна, правична и паралелна, без притисок и прелевање на проблемот со паркирање од една во друга зона”, соопштија од Градски паркинг.

Од претпријатието се надеваат дека во текот на мај 2026 година ќе се отпочне со реализација на зонското паркирање во двете подзони – Д11 и Д12.

Продолжува собирањето документација

Истовремено, ЈП Градски паркинг го одложи и процесот за прибирање на потребната документација од заинтересираните корисници за паркирање, кој ќе продолжи паралелно со подготовките.

Граѓаните на Ново Лисиче претходно најавија протести и блокади доколку зонското паркирање се воведе само во Реонски Центар, потсетувајќи дека градоначалниците Дејан Митески и Орце Ѓорѓиевски пред изборите ветиле паралелна имплементација на двете локации.