Индија и ЕУ постигнаа историски трговски договор: Царините драстично намалени, извозот ќе се удвои до 2032

Индија и Европската Унија денеска официјално соопштија дека го финализирале долгоочекуваниот и сеопфатен трговски договор, кој се оценува како еден од најзначајните економски пактови во последните години. Договорот доаѓа во период на зголемена глобална неизвесност и обиди на двете страни да ја намалат зависноста од нестабилните трговски односи со Соединетите Американски Држави.

Според соопштението на ЕУ, договорот ќе доведе до елиминирање или значително намалување на царините за 96,6 проценти од стоките што се тргуваат меѓу двете страни според вредност, со што се очекува извозот на Европската Унија во Индија да се удвои до 2032 година. Европските компании би можеле да заштедат околу 4 милијарди евра годишно на царински давачки.

Од индиска страна е соопштено дека ЕУ ќе ги намали царините за 99,5 проценти од стоките во рок од седум години. Царините ќе бидат целосно укинати за индиската морска храна, кожни и текстилни производи, хемикалии, гума, основни метали, како и за скапоцени камења и накит.

Индискиот премиер Нарендра Моди го оцени договорот како исклучително значаен.
„Вчера беше потпишан голем договор меѓу Европската Унија и Индија. Луѓето ширум светот го нарекуваат мајка на сите договори. Овој пакт ќе донесе огромни можности за 1,4 милијарди луѓе во Индија и за милионите граѓани на Европа“, изјави Моди.

Договорот значително ќе го отвори и досега строго заштитениот индиски пазар. Индија се обврза да ги намали царините за автомобили од сегашните 110 проценти на 10 проценти во рок од пет години, што ќе им донесе големи придобивки на европските производители како „Фолксваген“, „Рено“, „Мерцедес-Бенц“ и „БМВ“.

Дополнително, царините за вино ќе се намалат веднаш од 150 на 75 проценти, а постепено ќе паднат на 20 проценти, додека за жестоките алкохолни пијалоци ќе изнесуваат 40 проценти. Намалувања се предвидени и за европски производи како машини, електрична опрема, хемикалии, железо и челик.

„Европа и Индија денес пишуваат историја. Ова е само почеток“, порача претседателката на Европската комисија, Урсула фон дер Лајен, преку социјалните мрежи.

Вкупната трговска размена меѓу Индија и ЕУ во фискалната година до март 2025 изнесувала 136,5 милијарди долари. Формалното потпишување на договорот се очекува по завршувањето на правната проверка, која би требало да трае пет до шест месеци, а неговата целосна имплементација се очекува во рок од една година.

Договорот доаѓа кратко по потпишувањето на трговскиот пакт меѓу ЕУ и јужноамериканскиот блок Меркосур, како и по договорите со Индонезија, Мексико и Швајцарија. Во истиот период, Индија ги финализираше трговските договори со Велика Британија, Нов Зеланд и Оман.

Зголемениот број трговски договори, според аналитичарите, ја отсликува глобалната стратегија за заштита од трговските тензии со САД, особено по најавите на американскиот претседател Доналд Трамп за нови царини и политики кои ги нарушуваат традиционалните сојузи. Минатата година пропадна и обидот за трговски договор меѓу Индија и САД по прекин во комуникацијата меѓу двете влади.

Разговорите меѓу Индија и ЕУ беа обновени во 2022 година по деветгодишна пауза, а добија на интензитет по воведувањето на високи американски царини за повеќе трговски партнери, меѓу кои и царина од 50 проценти за индиски производи.

Според Аџај Шривастава, поранешен индиски трговски службеник, договорот со ЕУ ќе овозможи зголемен извоз од Индија во трудоинтензивните сектори и делумно ќе го ублажи негативното влијание од американските царини.