Ракетен и дронски напад врз Киев: Третина од градот без греење, 19 повредени

Речиси една третина од Киев остана без греење по масовен руски напад со ракети и дронови, соопшти градоначалникот на украинската престолнина, Виталиј Кличко. Тој информираше дека се регистрирани и прекини во снабдувањето со електрична енергија, при што делови од левиот брег на градот останале без струја.

„Електроинженерите интензивно работат на враќање на електричната енергија“, изјави Кличко.

Според официјалните информации, во воздушниот напад се повредени 19 лица, од кои 11 се хоспитализирани и се наоѓаат на лекување во здравствените установи во главниот град.

Градските власти соопштија дека е причинета штета на цивилната инфраструктура во седум области на Киев. Меѓу оштетените објекти се депо, студентски дом на Националниот воздухопловен универзитет, како и дом за стари лица. Од Градската државна администрација на Киев информираа дека нападите предизвикале пожари на повеќе локации, што довело до појава на смог во градот. Дополнително, погодени се и енергетски објекти во регионот на Киев, соопшти Регионалната воена администрација.

Покрај Киев, руски напади биле регистрирани и во регионот Одеса. Началникот на Регионалната воена администрација на Одеса, Олег Кипер, изјави дека цел на нападот била индустриска и пристанишна инфраструктура. Иако поголемиот дел од целите биле уништени од силите за воздушна одбрана, оштетена е опрема за транспорт на жито во еден житен лифт.

Според првичните информации, во регионот Одеса нема загинати или повредени лица.