Ермедин Адем: Работнички верува дека може до успех против Шкендија

Работнички и Шкендија на терените на тренинг центарот  „Петар Милошевски“ на ФФМ попладнево ќе го одиграат заостанатиот натпревар од четвртото коло од Првата МФЛ. Тимот од Дебар Маало се надева дека ќе успее да се рехабилитира за поразот од Вардар во недела, иако против себе ќе го има актуелниот првак Шкендија.

„Ако одиграме тимски и компактно како првото полувреме против Вардар, можеме да се надеваме на успех. Сите сме свесни дека заслуживме многу повеќе од пораз на претходниот меч, меѓутоа пеналот и црвениот картон на Бесир Демири ни пресудија. Но, тоа е веќе зад нас, затоа што нѐ очекува нов голем предизвик, дуелот против Шкендија. Тие се квалитетен тим, со одлични индивидуалци, но покажаа и дека се ранливи во досегашниот тек од шампионатот. Ќе мора да бидеме речиси совршени, но веруваме дека можеме да стигнеме до успех“, изјави Ермедин Адем.