Стопанската комора бара кратење на неработните денови: Празниците од недела да не се префрлаат во понеделник, ССМ експресно одби

Стопанската комора на Македонија најави дека до Министерството за економија и труд ќе достави официјална иницијатива за измени на Законот за празниците. Главните барања на бизнис-заедницата се вкупниот број на неработни денови во текот на една година да се ограничи на најмногу 13, а истовремено да се укине досегашната законска пракса државните и верските празници што паѓаат во недела автоматски да се префрлаат како неработен ден во понеделник.

Од Комората образложуваат дека целта на предложените законски измени не е укинување или забрана за одбележување на конкретни празници, туку оптимизација на работните процеси, јакнење на економската ефикасност и подигнување на домашната продуктивност.

Нееднаквост меѓу заедниците и ревизија на правата

Според бизнис-секторот, актуелниот систем на празници отвора и правни дилеми за уставната еднаквост на граѓаните од различни етнички и религиски заедници во однос на бројот на слободни работни денови.

„Нашиот предлог не предвидува бришење празници, туку ревидирање на правото на користење неработни денови. Сегашната поставеност може да се толкува дури и како неуставна, бидејќи ги става граѓаните во нерамноправна положба. На пример, припадниците на српската или влашката заедница, доколку се од православна вероисповед, имаат најмногу неработни денови – 11 општи за сите, пет за православните и дополнителни денови предвидени за нивната етничка заедница. Од друга страна, граѓаните од исламска вероисповед имаат значително помалку слободни денови по основ на религија. Имаме и апсурдни ситуации каде празникот „Свети Сава“, кој кај нас е неработен за српската заедница, во соседна Србија е редовен работен ден“, изјави проектниот менаџер во Стопанската комора, Анета Димовска.

ССМ: Работодавците да мислат на стандардот, а не на кратење права

Иницијативата на Стопанската комора наиде на експресен и остар отпор од страна на работничките претставници.

Претседателот на Сојузот на синдикатите на Македонија (ССМ), Слободан Трендафилов, категорично го отфрли предлогот, оценувајќи дека ваквите барања се на директна штета на работниците во услови кога животниот стандард постојано паѓа.

„Ваквиот предлог е целосно неприфатлив за синдикатите. Наместо работодавците континуирано да бараат начини како да им одземат права на работниците или да им кратат од слободното време, крајно време е да седнат на маса и да разговараме за она што е суштински проблем – реално и достоинствено зголемување на платите на македонскиот работник“, дециден е Трендафилов.

Овој предлог се очекува да отвори нова жестока дебата во рамките на Економско-социјалниот совет, каде власта, работодавците и синдикатите ќе ги соочат аргументите околу балансот меѓу продуктивноста на стопанството и работничките права.