ЖРЕПКА ЗА ВИМБЛДОН: Лина Ѓорческа на дебито против финалистката Анисимова

Македонската тениска гордост, Лина Ѓорческа, ја дозна својата противничка за историското прво коло на главниот турнир на Вимблдон. Најдобрата македонска тенисерка, која стана првата наша претставничка во сингл-конкуренција на еден Грен слем турнир, за ривалка ја доби високорангираната Американка, Аманда Анисимова.

Жрепката за најпрестижниот тениски турнир во светот не беше премногу наклонета кон македонската тенисерка. Ѓорческа ќе ги одмери силите со Анисимова, која во моментов е шеста на ВТА листата и важи за една од најквалитетните светски тенисерки на оваа подлога. За тежината на предизвикот доволно говори фактот што Американката минатата сезона играше во големото финале токму на тревата во Лондон.

И покрај тоа што Ѓорческа ја очекува исклучително тешка задача, нејзиниот пласман во главната фаза веќе се смета за огромен успех. Македонската тенисерка испиша нови страници во домашната спортска историја откако со максимален ефект ги помина квалификациите.

Патот на Лина до главниот ждреб помина низ три фази:

• Убедлив триумф над Шпанката Фита Болуда (2:0);
• Тешка победа по пресврт против Франциска Жорге од Португалија (2:1);
• Доминантна игра и елиминација на Луција Бронзети од Италија (2:0).

Дебито на Ѓорческа во главната ждрепка на неофицијалното светско првенство во тенис со нетрпение се очекува од македонската јавност. Без оглед на реномето на противничката, пласманот меѓу елитата е потврда за врвната форма во која се наоѓа најдобрата македонска тенисерка.