УЈП со алармантни податоци: Секој втор контролиран објект не издава фискални сметки, затворени 25 дуќани

Фискалната дисциплина во земјава бележи сериозен пад, покажуваат најновите податоци на Управата за јавни приходи (УЈП) за првите четири месеци од 2026 година. Според извештајот, кај дури 42 отсто од контролираните бизниси се утврдени неправилности, што е значителен раст во споредба со минатата година, кога овој процент изнесувал 32 отсто.

Инспекциските служби на УЈП спровеле контроли кај стотици субјекти, поттикнати од пријави на граѓани преку линијата 198, но и врз основа на сопствени анализи за сомнително работење.

Најчест прекршок – криење на прометот

Најголемиот дел од прекршоците, односно 242 случаи, се однесуваат на директно неиздавање фискални сметки. Покрај ова, загрижувачки е и растот на прекршоците кај бизнисите кои воопшто немаат воведено фискален систем – бројка која годинава скокнала на 32, за разлика од само седумте регистрирани случаи во истиот период лани.

„За утврдените неправилности изречени се глоби на правните и на одговорните лица кај вкупно 395 субјекти. Поради повторување на прекршокот во период од две години, кај 25 објекти е изречена најстрогата мерка – привремена забрана за вршење дејност и запечатување на просториите“, соопштуваат од Управата.

УЈП нуди „втора шанса“ пред дополнителни санкции

Од Управата за јавни приходи апелираат до сите даночни обврзници кај кои е откриен неевидентиран промет, истиот доброволно да го пријават во книговодството и да го прикажат во даночните пријави.

Сепак, од Управата се децидни: доколку фирмите не извршат доброволно усогласување, ќе следуваат дополнителни теренски контроли и ригорозни санкции согласно законите.

Овој пораст на сивата економија доаѓа и покрај засилените кампањи за подигнување на свеста кај потрошувачите и засилените контроли, што укажува на потребата од порестриктивни мерки за воспоставување на ред во готовинските плаќања.