Предупредување од Белата куќа: Примирјето со Иран виси на конец, збогатениот ураниум е сериозна закана

Американскиот претседател Доналд Трамп излезе со остра порака од Белата куќа, предупредувајќи дека актуелното примирје меѓу Вашингтон и Техеран е исклучително кревко и може да се распадне во секој момент. Тој истакна дека постоечкиот договор е слаб и не нуди јасни гаранции за долгорочна стабилност и мир.

Во своето обраќање, Трамп стави посебен акцент на иранската нуклеарна програма. Тој изрази длабока загриженост поради присуството на збогатен ураниум во Иран, квалификувајќи го како „многу опасен материјал“. Според тврдењата на американскиот претседател, Техеран директно отстапил од првичниот договор кој предвидувал целосно отстранување на овој материјал, што претставува сериозно кршење на довербата.

Коментирајќи ја нестабилната геополитичка динамика, Трамп посочи дека во услови на конфликт, одлуките и договорите се подложни на брзи промени. Сепак, тој упати смирувачка, но одлучна порака до американската јавност, нагласувајќи дека Соединетите Американски Држави не се затечени.

„Вашингтон има подготвено детални планови и сценарија за секој можен развој на настаните“, дециден беше Трамп.

На крајот од своето обраќање, американскиот лидер не пропушти да ги спомене и сојузничките сили на САД во регионот на Блискиот Исток. Тој изрази доза на разочарување, истакнувајќи дека Вашингтон очекувал многу поголема координираност и соработка од сојузниците, особено во делот на регионалната безбедност и прашањата поврзани со вооружувањето.