Двајца загинати и повеќе повредени во автобуска несреќа кај Мало Трново

Најмалку две лица го загубија животот, а повеќе патници се повредени во тешка сообраќајна несреќа што се случила рано утрово во југоисточна Бугарија, во близина на граничниот премин Мало Трново.

Според информациите на локалните власти, шест лица со тешки повреди се пренесени во болници во Бургас, додека уште десет лица се згрижени во Итната медицинска помош во Мало Трново. Сите повредени се извлечени од автобусот.

Во возилото патувале вкупно 39 украински државјани – 37 патници и двајца возачи, соопшти Регионалната дирекција на Министерството за внатрешни работи во Бургас.

Според првичните информации, автобусот застанал на патот откако останал без гориво. Градоначалникот на Мало Трново изјавил дека возилото потоа почнало да се движи наназад и се превртело, што довело до несреќата.

Екипи на полицијата и итната медицинска помош веднаш интервенирале на местото на настанот, а дел од патниците биле привремено згрижени во локален центар за дневна грижа.

Надлежните институции спроведуваат истрага за да ги утврдат точните причини и околности што довеле до трагедијата.