Пад на системот на Cloudflare ги урна речиси сите онлајн медиуми во Македонија

Падот на глобалната мрежа на Cloudflare во вторникот предизвика сериозни прекини во работата на интернет-услугите ширум светот, а меѓу најпогодените беа речиси сите онлајн медиуми и агрегатори на вести во Македонија.

Компанијата Cloudflare, која обезбедува заштита, оптимизација и управување со интернет-сообраќај за огромен број веб-страници, објави дека се соочува со технички проблем што доведе до недостапност на бројни сервиси и апликации.

„Cloudflare е свесен за проблемот и истражува проблем кој потенцијално влијае на повеќе клиенти“, соопшти компанијата нешто пред 7 часот наутро. „Работиме на утврдување на целосното влијание и на мерки за негово ублажување.“

Околу 20 минути подоцна, од Cloudflare информираа дека ситуацијата почнала постепено да се стабилизира:
„Гледаме дека услугите се опоравуваат, но клиентите може да забележат повисоки нивоа на грешки додека продолжуваме со санација на проблемот.“

Прекинот предизвика сериозни нарушувања кај голем број интернет-услуги, вклучувајќи ја и платформата X (поранешен Twitter), како и популарната онлајн игра League of Legends. Според DownDetector, проблеми биле забележани и кај Spotify, Amazon и OpenAI.

Cloudflare е глобално позната по тоа што им помага на веб-страниците да се заштитат од сајбер-напади и да обезбедат стабилно и брзо вчитување на содржината. Затоа, секој поголем дефект во нејзината инфраструктура веднаш предизвикува широки последици.

Прекинот доаѓа само еден месец по сериозниот дефект кај Amazon Web Services (AWS), кој исто така остави голем број онлајн сервиси недостапни со часови.