ИНЦИДЕНТ ВО ТЕТОВО: Родител пријавува напад врз две 11-годишни деца во центарот на Тетово, бара засилени полициски патроли

Родител од Тетово преку јавна објава на социјалните мрежи алармира за наводен напад врз неговиот 11-годишен син и уште едно дете, што, според неговото сведоштво, се случил вечерва во централното градско подрачје. Тој апелира до Министерството за внатрешни работи за итна реакција и засилено полициско присуство, изразувајќи загриженост за безбедноста на децата.

Според објавата на родителот, пет младинци ги пресретнале двете момчиња во близина на слаткарницата „Тропико“ и објектот „Наше Дете“, додека тие оделе на фудбалски тренинг во детската фудбалска школа „Фит Кид“. Тој тврди дека напаѓачите ги фатиле децата за врат и се обидувале да им ги соблечат јакните за да проверат дали носат обележја поврзани со навивачката група „Војводи“.

Родителот наведува и дека еден од напаѓачите го снимало настанот со мобилен телефон. Според неговите информации, видеоснимките од вакви инциденти наводно се споделуваат во групи на „ТикТок“, каде што се објавуваат снимки од малтретирање и тепање деца во Тетово.

Тој информира дека случајот бил пријавен во полиција и дека неговата сопруга заминала да даде изјава. Воедно, побарал надлежните служби да ги проверат безбедносните камери во центарот на градот и да ги идентификуваат лицата кои евентуално учествувале во инцидентот.

Во својата објава, родителот изразува загриженост дека станува збор за поширок проблем со малтретирање деца поради нивната облека и наводна поврзаност со навивачки групи. Тој тврди дека имало и претходни слични случаи и бара поголема ангажираност од секторот за малолетнички криминал, како и редовни полициски патроли на фреквентните локации во Тетово.

„Еден додека не се казни, ова само ќе продолжи, се додека и Вашите деца не ги препознете во видеата на Тик Ток“, порачува родителот, повикувајќи ги институциите да преземат конкретни мерки за заштита на малолетниците.

Засега нема официјална потврда од полицијата за околностите на пријавениот настан, ниту информации за евентуално идентификувани или приведени лица. Сите наводи за нападот и неговиот можен меѓуетнички мотив треба да бидат предмет на проверка од надлежните институции.