Собранието ги изгласа измените за административните службеници: Крај на унапредувањето без оглас, отказ по две негативни оценки
Новите законски решенија, донесени по скратена постапка, воведуваат строги мерки за оценување и унапредување во јавната администрација, но предизвикаа остар судир меѓу власта и опозицијата околу независноста на собраниската служба.
Собранието на Република Македонија денеска ги усвои измените и дополнувањата на Законот за административни службеници, како и измените на Законот за работните односи на службениците во Службата на Собранието, двата по скратена постапка. Законските решенија имаат за цел да обезбедат појасна, единствена и правно сигурна примена на прописите, изедначувајќи го статусот на службениците во Службата на Собранието и регулаторните тела со другите посебни државни службеници.
Клучни новини: Мерит систем и автоматски отказ
Меѓу најзначајните промени е укинувањето на можноста за унапредување на административните службеници без објавување интерен оглас, со што се гарантира еднаков пристап и примена на мерит системот во јавната администрација.
Законот воведува и строга правна последица за службениците кои не ги исполнуваат работните обврски: доколку административен службеник две години последователно биде оценет со најниската оценка „1 – не задоволува”, неговиот работен однос престанува по сила на закон. Истовремено, се овозможува поекономично и побрзо спроведување на постапките, со задржување на правото на жалба.
СДСМ: „ВМРО-ДПМНЕ прво ја укина независноста, сега ја враќа”
Опозициската СДСМ не ги поддржа законските измени, обвинувајќи ја владејачката партија за лицемерие и политички притисок врз администрацијата. Координаторот на пратеничката група на СДСМ, Оливер Спасовски, потсети дека независноста на собраниската служба не е новина, туку решение кое веќе постоеше во периодот од 2020 до 2024 година.
„Луѓето во Собранието го имаа ова пред шест години како право, од 2020 до 2024 година, додека ВМРО-ДПМНЕ не дојде на власт. И се сеќавате дека тоа го укинаа како право”, истакна Спасовски.
Тој додаде дека и самата ВМРО-ДПМНЕ во 2019 и 2020 година го поддржувала концептот на независна собраниска служба, оценувајќи дека е некоректно повторното воспоставување на тие решенија да се претставува како „историски исчекор”.
Предупредувања за дисциплински мерки и политички притисок
Спасовски изрази сериозна загриженост за одредбите поврзани со преместувањето, оценувањето и дисциплинската одговорност на административните службеници, предупредувајќи дека тие можат да отворат простор за злоупотреби.
„Ставате одредби со коишто можете да ги дисциплинирате сите во службата, во администрацијата, па и во собраниската служба. Собраниската служба треба да има независност и тука нема дилема, но таа не може преку други одредби да ја губи и на директен начин да се врши политички притисок”, нагласи координаторот на СДСМ.
Од опозицијата побараа и осамостојувањето на Собранието да продолжи со обезбедување независност и на собраниското обезбедување.
Мицевски (ВМРО-ДПМНЕ): „Сега се исправат грешките што СДСМ не ги исправи”
Координаторот на пратеничката група на ВМРО-ДПМНЕ, Никола Мицевски, ги отфрли критиките на опозицијата, истакнувајќи дека законските измени претставуваат корекција на пропустите од минатото.
„Има закони што се добри и што не се добри. Една работа да пофалевте, да речете – добро е, се исправи една работа. Тоа што не се донесе во 2019 година, сега се исправа”, рече Мицевски, додавајќи дека во периодот од 2019 до 2024 година, додека СДСМ беше на власт, грешките не биле коригирани.