ЛДП: ВМРО-ДПМНЕ го злоупотребува Собранието за носење закони по скратена постапка за партиски фаворити
Либерално-демократската партија (ЛДП) упати остри критики до владејачката ВМРО-ДПМНЕ, обвинувајќи ја дека го претвора Собранието во „брза лента“ за штанцање закони со скратена постапка, со единствена цел намалување на критериумите за функција во корист на партиски поединци.
Заобиколување на системските филтри и јавните расправи
Од ЛДП истакнуваат дека веќе пет дена владејачкото мнозинство молчи и не дава одговор зошто се бришат специфичните услови и критериуми во Законот за извршување на санкции. Според партијата, законот намерно е поднесен од група пратеници наместо од Владата, со цел да се избегнат законските обврски за транспарентност.
„Свесно се заобиколуваат сите системски филтри: нема објава на ЕНЕР, се укинува рокот од 20 дена за јавна расправа и целосно се игнорира Проценката на влијанието на регулативата (ПРИ)“, посочуваат од ЛДП, нарекувајќи ги измените „Закон за Пандов“.
Обвинувања за партиско лицемерие
Од опозициската партија потсетуваат на реториката на ВМРО-ДПМНЕ од времето кога беа во опозиција, нагласувајќи дека денес власта го прави токму она против кое порано се бореше.
„Владејачките мислат дека граѓаните заборавија што се зборуваше на митинзите и во изборните кампањи. Сè она што тогаш го критикуваа како „партиски инженеринг“, деградација на институциите и „закони скроени по мерка на поединци“, денес го спроведуваат без срам“, се наведува во соопштението.
Предлог на ЛДП: Забрана за двојни државјанства за сите функционери
Наместо, како што велат, носење закони кои им нанесуваат штета на институциите заради лични интереси, од ЛДП бараат пратениците да се фокусираат на системски реформи од интерес на граѓаните.
„Пратениците оваа недела имаат вистинска шанса наместо „ad hominem“ закони, да усвојат законски решенија со кои конечно ќе се укинат двојните државјанства за сите функционери – пратеници, министри, директори, судии и јавни обвинители. Сè останато е само остварување на теснопартиски интереси на грбот на граѓаните“, заклучуваат од ЛДП.