Страотна сообраќајна несреќа во Словенија: Загинаа тројца патници, се претпоставува дека станува збор за македонски државјани

Тројца патници го загубија животот, а две лица се повредени во тешка сообраќајна несреќа што попладнево, околу 16:28 часот, се случи на словенечкиот автопат Приморје, на делницата помеѓу Унец и Равбаркоманда. Според првичните полициски сознанија, настраданите во автомобилот се државјани на Македонија.

Автомобилот удрил во дефектиран камион

Според информациите од словенечката полиција, товарно возило – камион, поради дефект било принудно запрено на делот за паркирање. Од засега неутврдени причини, патничкиот автомобил во кој се наоѓале пет лица, со голема брзина удрил директно во задниот лев дел од приколката на камионот.

Од силината на ударот, три лица од автомобилот починале на самото место. Еден од преживеаните патници со сериозни телесни повреди со медицински хеликоптер бил итно пренесен во клинички центар, додека повредениот возач со возило на брзата помош бил транспортиран во болница.

Целосна блокада на автопатот кон Копер

На местото на трагедијата во тек е детален увид предводен од дежурен јавен обвинител и истражен судија, кои треба да ги утврдат точните причини за кобниот судир.

Поради тежината на несреќата и расчистувањето на патот, автопатот во правец кон Копер е целосно затворен за сообраќај. Словенечката сообраќајна полиција ги пренасочува патничките автомобили на излезот кај Унец, додека товарните камиони се исклучуваат уште кај Логатец.

Официјални информации за идентитетот на настраданите македонски државјани и околностите под кои се случила трагедијата се очекуваат по комплетирањето на истрагата.