Армијата слави 34 години постоење: Почесни плотуни во Скопје и свечености во Штип

Со низа воени почести и свечености во Скопје и Штип, денеска се одбележуваат 34 години од формирањето на Армијата. Централните активности по повод 18 Август – Денот на Армијата, ќе кулминираат со традиционалната артилериска стрелба и смотри на единиците.

Традиционални артилериски почести во „Илинден“

Во главниот град, единицата на артилерискиот баталјон вечерва во 19:00 часот во касарната „Илинден“ ќе изврши почесна стрелба со истрелување на 10 плотуни од шест артилериски орудија. Како дел од подготовките, претходно во 18:00 часот ќе биде извршена и пробна стрелба со еден плотун.

Воена смотра во Штип

Празникот ќе биде одбележан и во штипската касарна „Јане Сандански“ со свечена смотра на припадниците на 2. пешадиски баталјон и други единици. На настанот е најавено присуство на претставници од воениот врв, градоначалници од регионот, раководители на јавни институции и претставници на верските заедници.

Од Славеј Планина до НАТО алијансата

Датумот 18 август е избран во знак на сеќавање на 1943 година, кога на Славеј Планина е формиран баталјонот „Мирче Ацев“, првата организирана воена формација на Народноослободителната војска (НОВ) на Македонија.

Современиот процес на создавање на Армијата започна во 1992 година, по потпишувањето на договорот меѓу претседателот Киро Глигоров и раководството на ЈНА за дислокација на тогашната федерална војска. Денес, 34 години подоцна, македонската Армија е рамноправен партнер во најмоќниот колективен безбедносен систем, откако земјата во март 2020 година стана 30-та полноправна членка на НАТО.