Антикорупциската истрага во Украина се проширува: Претреси во канцеларијата на шефот на кабинетот на Зеленски

Членови на Националното биро за борба против корупцијата (NABU) и Специјализираното антикорупциско обвинителство (SAPO) утрово спроведуваат претреси во канцеларијата на Андриј Јермак, шеф на Кабинетот на претседателот на Украина, лоцирана во владиниот кварт во Киев. Акцијата е дел од обемна антикорупциска истрага што го зафаќа украинскиот енергетски сектор, јавува „Украинска правда“.

Новинарите на терен пренесуваат дека околу десет офицери на двете институции влегле во владината зона, а фотографиите од местото го потврдуваат нивното присуство. Медиумот се обидува да добие официјална изјава од НАБУ со повеќе информации за причините и целите на денешната операција.

Иако формалните детали остануваат непотврдени, претресите се поврзуваат со големиот корупциски скандал „Мидас“. Директорот на НАБУ, Семен Кривонос, на 25 ноември најави проширување на истрагата и вклучување на нови осомничени.

Антикорупциската акција започна на 10 ноември, кога НАБУ објави аудио снимки што откриваат коруптивни договори во енергетскиот сектор. Следеа претреси во домовите на бизнисменот Тимур Миндич и тогашниот министер за правда Херман Халушченко. Според извори, Миндич ја напуштил Украина само неколку часа пред инспекторите да ја претресат неговата куќа.

Веќе следниот ден, на 11 ноември, истражителите ги идентификуваа сите осомничени во истрагата поврзана со државната компанија „Енергоатом“.