Преживеани од „Пулс“ без првични повреди сега пријавуваат здравствени проблеми

Неколку месеци по трагедијата во дискотеката „Пулс“, лица кои во моментот на пожарот немале видливи повреди, почнале да пријавуваат нови здравствени симптоми – најчесто потешкотии со дишењето, но и други последици. Ова беше откриено преку нови сведочења на денешното судско рочиште.

Според обвинителството, дел од присутните во критичната ноќ изјавиле дека по настанот се чувствувале добро, но со тек на времето развиле симптоми што сериозно ја загрижуваат нивната здравствена состојба.

Трагедијата во „Пулс“ однесе 63 животи, а повеќе од 200 лица беа повредени. Судскиот процес и понатаму трае, а обвинети се и физички и правни лица кои се поврзуваат со пропустите што доведоа до катастрофата.

Новите здравствени пријави уште еднаш ја нагласуваат тежината на последиците и ја отвораат потребата институциите да спроведат пообемни проверки – не само на безбедносните стандарди и условите во објектот, туку и на долгорочната здравствена состојба на сите преживеани.