Високи водостоји низ државата: повеќето реки над ноемврискиот просек, Сатеска со рекордно зголемување

Водостоите на речните текови во земјава денес се значително повисоки од просечните за месец ноември, покажуваат најновите податоци на Управата за хидрометеоролошки работи (УХМР). Исклучок е единствено реката Брегалница кај Берово, каде е измерено ниво од 12 сантиметри, што е под вообичаените 22 сантиметри за овој период.

Кај останатите водотеци се регистрирани позначителни порастови. Вардар кај Јегуновце и кај Велес забележува двојно повисоки вредности од просекот. Треска во Македонски Брод бележи дури осумкратно зголемување – од просечните 13 сантиметри на денешни 108.

Пчиња кај Катлановска Бања е трипати над просекот (од 40 на 124 сантиметри), исто како и Бабуна кај Богомила (од 14 на 42 сантиметри) и Црна Река во Новаци, каде нивото скокнало од 65 на 246 сантиметри.

Најголемо отстапување е измерено кај Сатеска во Ботун, со водостој дванаесет пати повисок од ноемврискиот просек – од само 5 сантиметри на денешни 64.

Кај природните езера се забележуваат минимални зголемувања во однос на вчерашните мерења, но без значајни отстапувања од долгогодишниот ноемвриски просек.

Утринските температури на езерата се во рамките на сезонските норми: Охридското Езеро измерено е на 13,5 степени, Преспанското на 10,5, а Дојранското на 13 степени.