Германската економија под силен притисок: Над 147.000 работни места на удар, компаниите се селат во странство
Германската економија се соочува со сериозни предизвици поради растечките трошоци за енергија, работна сила и се поизразената бирократија, што ги принудува сè повеќе компании да затвораат или да го изместуваат своето производство надвор од земјата. Според анализата на Иницијативата за нова социјална пазарна економија (INSM), на која се повикува „Билд“, германските компании најавиле отпуштање на вкупно 147.522 работни места на 88 локации од 1 јули 2024 година наваму.
Организацијата предупредува дека Германија се движи кон „изгубена деценија“ ако не се зголеми продуктивноста. Од 2019 година БДП практично стагнира, додека населението расте, па така БДП по глава на жител се намалил за 1,5 проценти. Демографските промени го продлабочуваат проблемот, бидејќи до 2035 година се очекува значително намалување на работната сила по жител.
Платите и пензискиот систем под притисок
INSM предупредува дека без раст на продуктивноста, нема простор за поголем раст на платите. Во сценарио со низок раст од само 0,5%, реалните нето плати би пораснале за едвај 3,9% до 2040 година. Само при раст на продуктивноста од 1,5% годишно, платите би се зголемиле за над 20%.
Истовремено, пензискиот систем е под сериозен товар. За да се избегне зголемување на придонесите или намалување на реалните пензии, потребен е дополнителен раст на продуктивноста од околу два процентни поени годишно во периодот 2026–2035. Ситуацијата би се стабилизирала дури по пензионирањето на генерацијата бејби-бумери.
„Германија има сериозни структурни проблеми што го кочат економскиот раст. Тие се политички создадени, но можат и политички да се променат. Бидејќи есенските реформи не дадоа резултати, сега потребни се зимски реформи“, предупредува извршниот директор на INSM, Торстен Алслебе.
Производството се сели надвор од Германија
Дополнително, според германскиот завод за статистика Дестатис, значаен број компании ги префрлаат своите капацитети во странство за да ги намалат трошоците. Во периодот од 2021 до 2023 година, 1.300 компании со повеќе од 50 вработени делумно или целосно го префрлиле производството надвор од земјата — што претставува 2% од сите фирми од оваа категорија.
Овој процес довел до губење на 71.100 работни места, додека истовремено биле создадени само 20.300 нови позиции преку реструктурирања. Нето загубата изнесува околу 50.800 работни места, најмногу во производствениот сектор.