ЦУК: Интервенции низ државата поради обилните врнежи – одрони, поплавени подруми и пораст на водостоите

Екипите на Регионалните центри за управување со кризи (РЦУК) во текот на изминатото деноноќие интервенираа на повеќе критични локации низ државата, поради интензивните дождови што предизвикаа одрони, ерозија и локални поплавувања. Информациите ги соопшти директорот на ЦУК, Мухамед Али.

Според него, на подрачјето на Битола биле ангажирани екипи и механизација на јавни претпријатија и водостопански компании за расчистување наноси од речните корита и зајакнување насипи. Поради ерозија на патот кон Пелистер и кај селото Цапари, било предложено привремено затворање на стариот пат Р-106 и пренасочување на сообраќајот по магистралниот пат А-3.

Во Охрид и Кичево е забележано зголемување на водостоите, но без излевање. Најкритична точка е улицата Прилепска во Кичево, каде е побарана општинска интервенција. Во Охрид е постапено по пријава за поплавени подруми во населбата Железничка, предизвикани од диво ископани канали.

Во Куманово, реката Пчиња накратко излегла од коритото во делот Пелинце – Стрновац, но без нанесена штета. Во тек е расчистување на мостовите во Коинце и Пелинце од насобрани дрва и отпад, при што не е утврдена опасност по нивната стабилност.

На регионалниот пат Македонски Брод – Скопје, преку НП „Јасен“, регистриран е голем одрон што привремено го блокирал сообраќајот. Трасата е расчистена по една лента, а службите продолжуваат со активности за целосно обезбедување на патот.