Прв снег во Хрватска: Лика, Горски Котар и Сљеме под снежна покривка

Првите снегулки од оваа сезона ноќта кон вторник, 18 ноември, пристигнаа во Хрватска. Снег падна во Лика, Горски Котар, како и на врвот Медведница – Сљеме, каде што утрово беше забележана нова снежна покривка.

Хрватскиот автомобилски клуб (ХАК) соопшти дека автопатите кои минуваат низ планинските подрачја се покриени со снег и апелираше до возачите да возат внимателно и да се прилагодат на зимските услови на патиштата.

Според најавите, денес времето ќе биде претежно облачно со дожд, кој во Далмација на одредени места ќе биде пообилен. Во внатрешноста снегот ќе се задржи главно во повисоките региони. Од пладне се очекува врнежите да престанат од запад, со делумно разведрување.

Нов бран снег се најавува за петок, кога снежни врнежи ќе има на планините, но локално и во низините, особено во западниот дел на земјата. Саботата ќе донесе уште понестабилно време – обилни врнежи, дожд и снег на планините, а можно е и појава на снегулки во низините на западна и централна Хрватска.

Стабилизација на временските услови се очекува во недела.