Започна самитот на АПЕК – акцент на трговското примирје помеѓу САД и Кина

Кинескиот претседател Си Џинпинг денеска е во фокусот на годишниот самит на лидерите од пацифичкиот појас во јужнокорејскиот град Гјонгџу, каде што ќе оствари билатерални средби со премиерите на Канада, Јапонија и Тајланд. Самитот се одржува непосредно по постигнувањето на привремено трговско примирје меѓу Кина и САД, по разговорите со американскиот претседател Доналд Трамп.

Договорот, кој беше постигнат пред Трамп да ја напушти Јужна Кореја без да присуствува на дводневниот собир на Азиско-пацифичката економска соработка (АПЕК), предвидува запирање на понатамошни ограничувања за кинескиот извоз на ретки метали — мерка што се закануваше да ги наруши глобалните синџири на снабдување.

Поддршката на стабилни синџири на снабдување е една од клучните теми на овогодинешниот самит на АПЕК, економски форум кој обединува 21 земја и има за цел да ја поттикне соработката, трговијата и инвестициите во регионот. Иако одлуките на АПЕК не се правно обврзувачки, постигнувањето консензус меѓу членките станува сè потешко во контекст на глобалната економска неизвесност.

„Слободната трговија претрпува длабоки промени, а глобалната економска неизвесност се продлабочува. Токму затоа е неопходна поголема солидарност и економска соработка“, изјави домаќинот на самитот, јужнокорејскиот претседател Ли Џе Мјунг, во своето обраќање при отворањето на пленарната сесија.

Американската делегација на самитот ја предводи министерот за финансии Скот Бесент, кој го заменува претседателот Трамп.

Во својот говор, кинескиот претседател Си Џинпинг повика на заштита на мултилатералниот трговски систем и зајакнување на економската соработка меѓу земјите од регионот.

„Колку што морето е побурно, толку повеќе мора да се држиме заедно“, порача Си, нагласувајќи дека заедничката стабилност и доверба се клучни за одржување на глобалниот раст.

Ли Џе Мјунг истакна дека АПЕК се наоѓа во критичен момент поради брзите промени во светскиот економски поредок, додавајќи дека „иако не секогаш можеме да бидеме на иста страна, мора да работиме заедно за заеднички просперитет“.

Регионот на АПЕК учествува со речиси 50% во глобалната трговија и со 61% од светскиот бруто-домашен производ, што го прави еден од највлијателните економски блокови во светот.