Почнува дистрибуцијата на избирачките ливчиња за вториот круг од локалните избори

Од Portal На 30 Oct, 2025 во 10:08 часот.

Од печатницата „Киро Дандаро“ во Битола утрово започнува дистрибуцијата на 1.013.357 избирачки ливчиња за вториот круг од локалните избори 2025, информираат од Државната изборна комисија (ДИК).

Во вториот круг ќе се избираат градоначалници во 32 општини и во Градот Скопје.

Во сабота, пред денот на изборите, ќе гласаат болни и изнемоштени лица, како и затвореници и лица во домашен притвор, чии пријави се одобрени од општинските изборни комисии.

Според податоците на ДИК, изборите ќе ги следат 1.569 набљудувачи, од кои 904 домашни и 651 меѓународен, а за известување се акредитирани и 14 странски новинари.

На 2 ноември (недела) ќе има и прегласување на три избирачки места во општина Шуто Оризари, каде што резултатите може да влијаат врз распределбата на советничките мандати.

Втор круг во Скопје и уште 32 општини

Во Град Скопје право на глас имаат 474.394 гласачи, кои ќе избираат меѓу Орце Ѓорѓиевски (ВМРО-ДПМНЕ и коалицијата) и Амар Мециновиќ (Левица).
Во првиот круг Ѓорѓиевски доби 91.663 гласови, а Мециновиќ 30.665.

Втор круг ќе има и во општините Карпош, Центар, Аеродром и Шуто Оризари.

Во Карпош, изборната трка се води меѓу актуелниот градоначалник Стевче Јакимовски и Сотир Лукровски (ВМРО-ДПМНЕ). Право на глас имаат 56.856 избирачи.
Во Аеродром се натпреваруваат Дејан Митески (ВМРО-ДПМНЕ) и Александар Трајановски (СДСМ), со 68.772 гласачи на списокот.
Во Центар гласаат 44.109 граѓани, а во трката се Мирослав Лабудовиќ (Движење ЗНАМ) и Горан Герасимовски (СДСМ).
Во Шуто Оризари, каде гласаат 23.893 избирачи, во втор круг се Ерџан Демир (ВМРО-ДПМНЕ) и Курто Дудуш (Унија на Ромите).

Изборна трка и низ општините низ земјата

Втор круг ќе се одржи и во следниве општини:

Боговиње: Бесник Емши (НАИ) и Фети Абази (ВЛЕН) – 29.088 гласачи
Брвеница: Хаќим Рамадани (ВЛЕН) и Јовица Илиевски (ВМРО-ДПМНЕ) – 16.150 гласачи
Валандово: Перо Костадинов (СДСМ) и Ѓоко Камчев (ВМРО-ДПМНЕ) – 9.846 гласачи
Виница: Гоце Милевски (СДСМ) и Митко Костадиновски (ВМРО-ДПМНЕ) – 17.060 гласачи
Дебар: Фисник Меља (ВЛЕН) и Рамадан Имери (Група избирачи) – 19.763 гласачи
Дебрца: Златко Силјановски (ВМРО-ДПМНЕ) и Зоран Ногачески (Група избирачи) – 3.937 гласачи
Демир Капија: Лазар Петров (СДСМ) и Борчо Коцев (ВМРО-ДПМНЕ) – 3.186 гласачи
Кичево: Фатмир Дехари (НАИ) и Александар Јовановски (ВМРО-ДПМНЕ) – 51.016 гласачи
Конче: Благој Илиев (СДСМ) и Златко Ристов (ВМРО-ДПМНЕ) – 2.716 гласачи
Кочани: Влатко Грозданов (ВМРО-ДПМНЕ) и Венко Кртевски (Група избирачи) – 32.503 гласачи
Крушево: Томе Христовски (СДСМ) и Нико Чонески (ВМРО-ДПМНЕ) – 7.774 гласачи
Куманово: Максим Димитриевски (ЗНАМ) и Горан Стојковски-Диро (Група избирачи) – 94.041 гласач
Лозово: Ацо Велковски (СДСМ) и Бошко Цветковски (ВМРО-ДПМНЕ) – 1.905 гласачи
Македонска Каменица: Соња Стаменкова (СДСМ) и Димчо Атанасоски (ВМРО-ДПМНЕ) – 6.650 гласачи
Македонски Брод: Жарко Ристески (ВМРО-ДПМНЕ) и Милосим Војнески (Група избирачи) – 4.835 гласачи
Могила: Драганчо Саботковски (ВМРО-ДПМНЕ) и Сашо Пивковски (Група избирачи) – 4.671 гласач
Неготино: Петар Мантев (СДСМ) и Марија Нацева (ВМРО-ДПМНЕ) – 15.920 гласачи
Пробиштип: Драган Атанасов (СДСМ) и Тони Тоневски (ВМРО-ДПМНЕ) – 12.251 гласач
Ранковце: Даниел Крстевски (СДСМ) и Даниел Павловски (ВМРО-ДПМНЕ) – 2.921 гласач
Росоман: Стојан Николов (СДСМ) и Ѓорѓи Крстевски (ВМРО-ДПМНЕ) – 3.297 гласачи
Струга: Арсим Даљипи (НАИ) и Менди Ќура (Група избирачи) – 62.711 гласачи
Студеничани: Ејуп Абази (НАИ) и Азем Садики (Група избирачи) – 17.946 гласачи
Тетово: Бајрам Реџепи (НАИ) и Биљал Касами (Вреди) – 87.878 гласачи
Чешиново-Облешево: Горанчо Крстев (СДСМ) и Јорданче Костадинов (ВМРО-ДПМНЕ) – 5.068 гласачи
Чучер Сандево: Сашко Комненовиќ (СДСМ) и Зоран Бајовски (ВМРО-ДПМНЕ) – 8.854 гласачи

Нови избори во четири општини

Во општините Гостивар, Врапчиште, Центар Жупа и Маврово Ростуше, каде што не беше постигнат потребниот цензус од една третина излезеност, ќе се спроведе нова изборна постапка за избор на градоначалници, откако ќе бидат објавени конечните резултати од локалните избори.