Изет Меџити: Национална алијанса за интеграција ќе се распушти, следуваат нови политички движења

Лидерот на Алтернатива, Изет Меџити, во гостување во емисијата „Ајде да зборуваме“ на ТВ21, изјави дека Национална алијанса за интеграција (НАИ) ќе биде распуштена и дека во политичкиот блок ќе следат структурни промени.

Според Меџити, во НАИ владеело уверување дека ќе го преземат најголемиот дел од гласачкото тело по заминувањето на Арбен Таравари од коалицијата ВЛЕН, но резултатите од локалните избори, како што вели, ги разочарале и им ја одзеле надежта.

„Не го очекував овој резултат во НАИ, особено по заминувањето на Таравари. Мислеа дека имаат 90% од гласачкото тело. Но, како што кажав и претходно на ТВ21, лидерите можат да си заминат, но членството останува во ВЛЕН – и тоа се потврди. Сега кај нив не се работи само за чувство на загуба, туку за загуба на надеж. Дел од нивното гласачко тело веќе се движи кон ВЛЕН, постојат комуникации и очекувам НАИ да се распушти и да се појават нови политички движења“, изјави Меџити.

Меџити не ја исклучи можноста дел од политичарите од НАИ да станат дел од владината структура, истакнувајќи дека партиите постојано комуницираат и дека политичката сцена во земјава е многу динамична.

„Не го негирам тоа. Може да се случи. Комуницираме, бидејќи политичката сцена стана многу измешана. Имаше многу турбуленции сè додека не се формираа два табора, а мислам дека турбуленциите сè уште не се завршени“, рече Меџити.