Преговорите меѓу Авганистан и Пакистан во Истанбул завршија без договор

Разговорите меѓу Авганистан и Пакистан за постигнување долгорочен прекин на огнот, што се одржаа во Истанбул со посредство на Турција и Катар, завршија без договор, соопштија извори запознаени со преговорите.

Иако на 19 октомври во Доха беше постигнат привремен прекин на огнот, двете страни не успеаја да најдат заедничка основа во втората рунда разговори.

Според извори од двете страни, Авганистан и Пакистан се обвиниле меѓусебно за неуспехот. Пакистански безбедносен извор изјави дека Талибанците не сакале да се обврзат дека ќе ги контролираат пакистанските Талибанци, додека авганистански извор тврдеше дека Кабул нема контрола врз нападите што ги изведуваат тие групи.

Судирите меѓу двете страни се интензивираа откако Пакистан изврши воздушни напади врз Кабул, насочени и кон лидер на пакистанските Талибанци, по што Талибанците возвратија со напади врз пакистански воени пунктови долж границата долга 2.600 километри.

Пакистанскиот министер за одбрана предупреди дека неуспехот на разговорите може да доведе до „отворена војна“, иако, како што рече, верува дека Авганистан сака мир.

Според податоците на пакистанската војска, во викендовните судири загинале пет пакистански војници и 25 талибански милитанти во близина на авганистанската граница.