Тројца загинати во нов руски напад со дронови врз Киев

Во најнов напад со руски беспилотни летала врз украинската престолнина Киев, загинаа три лица, а повредени се најмалку 27, меѓу кои и шест деца, соопшти градоначалникот Виталиј Кличко.

Нападот се случил во округот Десњански, каде што беспилотно летало погодило деветкатна станбена зграда, по што избувнал пожар. Спасувачите извлекле 13 лица од горните катови.

Друго беспилотно летало удрило во 16-катна зграда, оштетувајќи прозорци од првиот до деветтиот кат, а штета е пријавена и на објект во областа Оболонски.

Ова е втор напад врз Киев во последните 24 часа, потврдија градските власти, додека спасувачките екипи и натаму работат на теренот на расчистување на последиците.