Во тек дистрибуцијата на вакцините против сезонски грип – граѓаните ќе добијат СМС-известувања за термини

Министерството за здравство информира дека е во тек дистрибуцијата на вакцините против сезонски грип до јавните здравствени установи низ државата. Според најавите, во текот на оваа недела граѓаните кои се пријавиле за бесплатна вакцинација ќе добијат СМС-порака со термин за имунизација.

Вакцинацијата ќе се спроведува на 35 вакцинални пункта низ Македонија, од кои пет се во Скопје.

Од Министерството потсетуваат дека сè уште е во тек пријавувањето за бесплатна вакцинација за ризичните категории на население, кои можат да се регистрираат преку онлајн апликацијата vakcinacija.mk или преку својот матичен лекар.

Со бесплатната вакцинација се опфатени следните категории:

• лица постари од 65 години,

• лица со хронични заболувања,

• здравствени работници,

• бремени жени,

• деца од 6 месеци до 5 години,

• лица сместени во установи за социјална заштита и вработените во нив.

Од Министерството нагласуваат дека вакцинацијата е најефикасна превентивна мерка за заштита од грип и неговите компликации.
Годинава се набавени 80.000 дози четиривалентна вакцина од реномираниот холандски производител „Абот“.