Израел и Хамас подготвуваат договор за ослободување на заложниците во Газа под покровителство на планот на Доналд Трамп

Израел и Хамас се очекува денес, четврток, да потпишат договор во Египет за ослободување на сите преостанати заложници во Појасот Газа, како дел од мировниот план на американскиот претседател Доналд Трамп за прекин на двегодишната војна во енклавата.

Првата фаза од договорот, кој Трамп го објави доцна синоќа, претставува значаен напредок во напорите да се стави крај на конфликтот што однесе десетици илјади животи, ја разруши Газа и предизвика регионални тензии на Блискиот Исток.

Израелскиот премиер Бенјамин Нетанјаху денес го свикува својот кабинет за да го одобри договорот. Сепак, крајно десниот министер за финансии Безалел Смотрич најави дека тој и неговата партија Религиозен ционизам ќе гласаат против спогодбата.

Според извори блиски до преговорите, 48 заложници – од кои се смета дека 20 се сè уште живи – ќе бидат ослободени околу 72 часа по официјалното одобрување на договорот од израелската влада.

Во замена, Израел ќе ослободи речиси 2.000 палестински затвореници и ќе ја зголеми хуманитарната помош за опколената територија. Дополнително, израелските сили ќе се повлечат од првите линии во Газа, што ќе биде почеток на постепено повлекување на војската.

Договорот беше постигнат по интензивни посреднички разговори во Египет, на кои учествуваа американскиот пратеник Стив Виткоф и Џеред Кушнер – зетот на Трамп и еден од архитектите на планот – заедно со високи претставници од Катар, Египет и Турција. Израел и Хамас преговараа индиректно преку посредници.

Новината за прекинот на огнот предизвика прослави во Газа – млади излегоа на улиците, а семејства си разменуваа честитки, јавува Financial Times.

Претседателот на Палестинската национална управа, Махмуд Абас, изрази надеж дека договорот „ќе биде вовед во постигнување трајно политичко решение“, пренесува државната новинска агенција Вафа.

Абас го пофали американскиот претседател Доналд Трамп и останатите посредници за нивната улога во постигнувањето на спогодбата и ги повика сите страни веднаш да започнат со имплементација на планот – вклучително и ослободување на заложниците и затворениците, зголемување на хуманитарната помош за Газа и спречување на ново раселување или анексија на територии.