Скопјани ќе плаќаат повисока цена за водата – 35,02 денари по кубик

Од овој месец граѓаните на Скопје ќе плаќаат по 35,02 денари за секој потрошен кубик вода, што претставува зголемување од 3,2 денари. Покрај цената на водата за пиење, поскапување има и кај услугите за собирање и одведување на урбаните отпадни води, како и кај прочистувањето, што во целина претставува раст од околу 10 проценти.

Регулаторната комисија за енергетика и водни услуги ја донесе одлуката на 25 август. Од таму посочуваат дека биле приморани да реагираат бидејќи Советот на Град Скопје не ја усогласил цената во законскиот рок и не ги спровел препораките за корекција.