Филипче: Власта намерно отвора простор за изборни злоупотреби

Претседателот на СДСМ, Венко Филипче, во изјава за телевизија Телма оцени дека власта свесно создава услови за изборни неправилности, бидејќи, според него, ВМРО-ДПМНЕ губи значителен број гласови.

„Сметам дека тоа е намерно. Анкетите и анализите покажуваат дека ВМРО-ДПМНЕ губи над 100 илјади, па дури и околу 120 илјади гласови. Во таква ситуација се посегнува по инструменти кои можат сериозно да го загрозат изборниот процес и демократијата“, изјави Филипче.

Тој ја коментираше и неодамнешната изјава на премиерот Христијан Мицкоски, кој и една година по доаѓањето на власт ги посочи СДСМ и ДУИ како главни виновници за состојбата во државата. Според Филипче, тоа е показател за „целосна неспособност и немање капацитет да се води држава“.

Филипче потсети дека и покрај одлуката на Уставниот суд за укинување на дел од Изборниот законик, власта до последен момент чекала да поднесе предлог-закон, и тоа откако изборите веќе биле распишани. Како дополнителен проблем го посочи фактот што владејачката коалиција не успеала да обезбеди поддршка од партнерите во ВЛЕН.

„За сето ова целосно одговорен е премиерот и коалицијата. За жал, се отвора можност за злоупотреби кои ќе им одат во корист, затоа што е очигледно дека губат голем број гласови“, рече лидерот на СДСМ.

Тој најави дека партијата ќе ги следи сите чекори на власта и ќе реагира на секоја злоупотреба што може да го наруши демократскиот изборен процес.