Убиен палестински камерман во Појасот Газа

Палестинската новинска агенција (ВАФА) соопшти дека израелски војници застрелале и убиле палестински камерман во северниот дел на Појасот Газа. Според агенцијата, станува збор за Калед ал Мадхун, кој бил погоден со огнено оружје во близина на преминот Зиким.

Израелската армија засега не го коментираше инцидентот.

Оваа вест доаѓа по средината на август, кога израелските сили во градот Газа убија четворица новинари на „Ал Џезира“. Израелската армија тогаш тврдеше дека меѓу нив бил и дописникот Анас ал-Шариф, кој наводно водел терористичка ќелија на Хамас.

Според Комитетот за заштита на новинарите (ЦПЈ) и Меѓународната федерација на новинари (ИФЈ), од почетокот на војната во октомври 2023 година до 11 август 2025 година, во израелските напади во Појасот Газа загинале 274 новинари и медиумски работници, од кои 269 биле Палестинци.