ВМРО-ДПМНЕ по поразот во Брвеница: „Сами против сите — ДУИ, СДС, Левица и ВРЕДИ се обединија против нас”
Партијата го признава поразот на Стојанчо Радичевски, но истакнува раст од 1.200 гласови меѓу двата круга и остро го критикува коалицискиот партнер ВРЕДИ, нарекувајќи го „тројански коњ" во корист на ДУИ.
ВМРО-ДПМНЕ утрово излезе со соопштение по поразот на нивниот кандидат Стојанчо Радичевски на предвремените локални избори во Општина Брвеница, каде според официјалните резултати победи Аркин Јахији од ДУИ со разлика од над 200 гласови.
„Една Брвеница за сите е повеќе од концепт во кој ние ја потенциравме силата на единството, соживот и меѓусебната почит, инфраструктурните инвестиции, подобрите услови за живот, додека противниците искористувајќи ја демографската состојба повикуваа на етничко гласање”, се наведува во соопштението.
Од партијата обвинија дека опонентите се обединиле и изборната трка ја претвориле „во ринг на поделби по разни основи” наместо во натпревар на идеи.
Раст на гласовите, но недоволен за победа
ВМРО-ДПМНЕ истакнува значителен раст на поддршката меѓу двата круга, иако тој не бил доволен за победа.
„Од 3.000 гласа во првиот круг стигнавме до 4.200 гласа за ВМРО-ДПМНЕ во вториот круг, додека споредено со парламентарните избори растот на гласови е 1.300″, наведуваат од партијата.
Остри критики кон СДС, Левица и коалицискиот партнер ВРЕДИ
Најострите зборови во соопштението се упатени кон останатите политички партии, вклучително и кон коалицискиот партнер на ВМРО-ДПМНЕ на национално ниво.
„ДУИ, СДС, Левица, за жал, и ВРЕДИ како тројански коњ од една страна, а ВМРО-ДПМНЕ од другата страна. Ние сами против сите”, порачуваат од партијата.
Од ВМРО-ДПМНЕ тврдат дека СДС и Левица, кои во првиот круг завршиле на четврто и петто место, во вториот круг „се ставиле во служба на ДУИ за одвлекување на гласови”.
Посебна критика е упатена кон ВРЕДИ:
„Тоа што предизвикува особена жал е што нашиот коалициски партнер, ВРЕДИ ја пропушти можноста во Брвеница да биде поразличен од ДУИ и да се издигне над етничкиот национализам, со што се покажа дека исто како и кандидатите на СДС и Левица беа тројански коњ во корист на ДУИ”, се вели во соопштението.
„Брвеница нема да биде заборавена”
И покрај поразот, од ВМРО-ДПМНЕ порачуваат дека граѓаните на Брвеница — и Македонци и Албанци — ќе очекуваат проекти и развој, а не национализам.
„Брвеница нема да биде заборавена, Владата предводена од ВМРО-ДПМНЕ ќе продолжи да инвестира, да вложува и да гради за развој на општината и подобри услови за живот на граѓаните”, заклучуваат од партијата.
Контекст
Предвремените локални избори во Брвеница беа обележани со обвинувања за „изборен туризам” и етничка поларизација. Според неофицијалните резултати, Аркин Јахији од ДУИ победи со разлика од над 200 гласови, а излезноста во вториот круг изнесуваше над 40 проценти — значително повеќе од првиот круг.