СДСМ: Мицкоски го „чисти“ Груевски од одговорност, пресудата за „Талир 2“ е крај на правдата

Опозицискиот СДСМ упати жестоки критики по објавувањето на пресудите за случајот „Талир 2“, со кои поранешниот премиер Никола Груевски е ослободен, а имотот на ВМРО-ДПМНЕ, вклучително и седиштето на партијата, е одмрзнат. Според социјалдемократите, ова е јасен доказ дека правосудниот систем е под целосна контрола на актуелниот премиер Христијан Мицкоски.

„Нема правда“, вака накратко од СДСМ ја коментираат последната судска одлука со која „Белата палата“ и преостанатиот партиски имот на ВМРО-ДПМНЕ повторно се ставени на располагање на владејачката партија.

Од партијата со седиште на Бихаќка обвинуваат дека по осум години, имотот вреден вкупно 16 милиони евра (14 милиони за централното седиште и 2 милиони евра за останатиот имот) се враќа во рацете на ВМРО преку, како што велат, оркестрирано судско-обвинителско чистење на одговорноста на Никола Груевски.

„Криминална организација на власт“

„Вака изгледа кога криминална организација е на власт – таа се грижи само за сопствените интереси и за спас на своите кадри од правна одговорност. Граѓаните се сведоци на брутално газење на правната држава“, стои во партиското соопштение.

СДСМ го обвинува премиерот Мицкоски дека свесно го штити својот претходник и дека Владата намерно ја саботира неговата екстрадиција од Унгарија.

Мицкоски обвинет за опструкција на екстрадицијата

„Груевски е осуден криминалец кој наместо во Идризово, понатаму продолжува да ужива во слобода во Унгарија. Мицкоски намерно не бара негова екстрадиција и ги кочи документите кои со месеци „патуваа“ меѓу институциите, за на крајот воопшто да не бидат испратени. Сето ова е дел од план за негово дефинитивно спасување“, додаваат од СДСМ.

Ослободителната пресуда во предметот „Талир 2“ предизвика нови поларизации во јавноста, отворајќи ја повторно дебатата за интегритетот на македонското судство и влијанието на извршната власт врз деликатните политички процеси.