„ВРЕДИ“ ГИ ФИНИЛИЗИРАШЕ КАДРОВСКИТЕ РЕШЕНИЈА: Шасивари, Ферати и Сулејмани се новите министри во кабинетот на Мицкоски

Коалицијата „Вреди“ вечерва на седница на централното Претседателство ги усвои предлозите за нови членови на извршната власт во рамки на претстојната владина реконструкција. Со овие кадровски рокади, албанскиот коалиционен партнер презема клучни ресори, вклучително и правдата и културата, најавувајќи нова енергија во владиниот кабинет.

Според официјалната одлука на партиското раководство, нов министер за правда ќе биде универзитетскиот професор Џетон Шасивари. Ресорот односи меѓу заедниците ќе го води Агон Ферати, додека за нов министер за култура и туризам е предложен Седат Сулејмани.

Од коалицијата „Вреди“ истакнуваат дека изборот на новите кадри е доказ за нивната посветеност на реформските процеси и одговорниот пристап кон владеењето.

„Вреди решително продолжува по патот на промените. Со овој тим се потврдува нашата посветеност на развојот и достоинственото застапување на интересите на граѓаните. Носиме професионални кадри кои ќе дадат нов импулс во работата на Владата“, се наведува во партиското соопштение.

Континуитет во економските и европските ресори

Покрај новите именувања, „Вреди“ ги задржува своите позиции во неколку стратешки важни министерства. Своите функции во реконструираниот кабинет на Христијан Мицкоски ќе продолжат да ги извршуваат:

• Беким Сали – прв вицепремиер и министер за европски прашања;
• Бесар Дурмиши – министер за економија и труд;
• Мухамет Хоџа – министер за животна средина и просторно планирање.

Со оваа кадровска конфигурација, „Вреди“ го заокружува својот тим во извршната власт, со фокус на интеграцијата на Македонија во ЕУ, економскиот развој и јакнењето на правната држава. Овие предлози се очекува веќе утре да бидат официјално доставени до Собранието.