Аларм во ЕУ: Пронајден хепатитис А во замрзнато овошје од Србија, производот итно повлечен од пазарот
Европскиот систем за брзо предупредување за безбедност на храната (RASFF) објави дека во Германија е детектирано присуство на вирусот на хепатитис А во замрзната мешавина од бобинки со потекло од Србија. Германските контролни служби го оценија здравствениот ризик како „сериозен“ и наредија итно повлекување на спорниот производ од продажба.
Вирусот бил откриен за време на официјална контрола на пазарот, во примерок земен на 20 април. Ова не е прв ваков случај поврзан со овошјето од овој регион – според податоците на RASFF, слични инциденти биле забележани и во минатото, што го отвора прашањето за хигиенските стандарди во процесите на обработка и пакување на замрзнатите производи.
Што претставува хепатитис А?
Вирусниот хепатитис А, во народот познат како „заразна жолтица“, е акутно инфективно заболување на црниот дроб. Главниот извор на инфекција е заболениот човек, а вирусот најчесто се излачува преку столицата.
Како се пренесува?
- Директен контакт: Преку нечисти раце контаминирани со вирусот.
- Индиректен контакт: Преку загадена храна, вода или предмети за лична и општа употреба.
- Контаминирано овошје: Најчесто се случува кога плодовите се наводнуваат со загадени води или се берат и пакуваат од лица кои не одржуваат соодветна хигиена.
Симптоми и прогноза
Болеста се смета за релативно лесна со добра медицинска прогноза, но кај одредени категории може да предизвика компликации. Влезната точка на вирусот е дигестивниот тракт.
Иако смртноста е ниска (помалку од еден случај на 1.000 пациенти), ризикот е зголемен кај децата под пет години и кај лицата над 50-годишна возраст. Експертите советуваат потрошувачите да бидат внимателни со замрзнатото овошје и, доколку постои сомнеж, истото термички да го обработат пред консумација.
Производителот и извозникот од Србија се соочуваат со строги контроли и можни санкции од страна на европските регулатори за храна, со цел да се спречи понатамошно ширење на инфекцијата во земјите на ЕУ.