Мицкоски најави намалување на акцизите – дизелот за 4 денари, бензините за 2 денари поевтино

По неколку недели тврдења дека ситуацијата е под контрола, премиерот Христијан Мицкоски денеска призна дека „нè чека тешка година” и најави дополнителни мерки – намалување на акцизите за дизелот за 4 денари и за бензините за 2 денари по литар. Седница на Владата е закажана за утре, а премиерот најави и можен ребаланс на буџетот во мај.

Нови мерки од утрешната владина седница

Мицкоски, на настан во општина Илинден, соопшти дека биле исполнети условите за намалување на акцизите:

„Берзата за нафтата се затвори во четвртокот заради велигденските празници и нашите калкулации покажуваат дека дизелот требаше да поскапи некаде околу 7 денари, а бензините 1,5 до два денара. Со промената на акцизите претпоставувам дека цената на дизелот во понеделник ќе се коригира за околу 3 денари”, рече премиерот.

Преговори со „Окта” за продолжување на попустот

Мицкоски информираше дека истекува попустот од 3 денари за дизелот што го давала „Окта”, а Владата ќе преговара со компанијата за негово продолжување.

„Доколку ‘Окта’ го продолжи попустот од два денари за литар, тоа значи дека ќе имаме повторно намалување за 2,5 денари на цената на бензините”, изјави премиерот.

ДДВ-то останува на 10 отсто уште две недели

Мерката за намалено ДДВ за горивата од 10 отсто ќе продолжи уште две недели, а за натамошното продолжување ќе се одлучува дополнително.

Дополнително, Министерството за финансии анализира можност за намалување на ДДВ-то за сите основни прехранбени производи од 5 на 0 отсто, но Мицкоски оцени дека тоа е „премалку” во споредба со поголемите мерки.

„Нè чека тешка година” – најава за ребаланс на буџетот

Премиерот, кој претходно тврдеше дека Владата ја има ситуацијата под контрола, денеска призна дека земјата се подготвува за подолг и потежок период.

„Мора да се подготвиме за тешка година. Треба да се помине овој период, а не да се брои приходот, профитот”, рече Мицкоски.

Тој најави ребаланс на буџетот:

• Мај – подготовка и владина процедура
• Јуни – собраниска постапка
• Јули – почеток на работа со ребалансиран буџет

Намалената акциза ќе значи помалку десетици милиони евра во буџетот, но Мицкоски тврди дека средствата се доволни, потсетувајќи дека Владата враќа стари долгови од 2,5 милијарди евра од претходната власт и веќе исплатила прва рата од 25 милиони евра за солидарниот данок.

Инфлацијата во март: 4 до 5 отсто

Премиерот очекува инфлацијата во март да биде помеѓу 4 и 5 отсто, оценувајќи дека „првите робустни чекори го даваат својот ефект”.

Доволно гориво – нема потреба од рационализирање

Мицкоски уверува дека земјата има доволно нафтени деривати и дека нема индиции за ограничување на волуменот, за разлика од некои земји од ЕУ.

• Во продуктоводот Солун-Скопје: гориво за 60 дена
• Во стоковите резерви: за дополнителни 62 дена
• Потрошувачката зголемена за 15 отсто поради точење гориво од граѓани на соседните земји

ЕУ се подготвува за долга криза

Паралелно, европскиот комесар за енергија Дан Јоргенсен за Financial Times предупреди дека Европа се соочува со долг период на нестабилност.

„Ова ќе биде долга криза. Цените на енергијата ќе останат многу високи многу долго време”, рече Јоргенсен, додавајќи дека за некои „покритични” производи ситуацијата ќе биде „уште полоша во наредните недели”.

ЕУ ги разгледува сите опции, вклучително рационализирање на горивото и активирање дополнителна нафта од резервите за итни случаи.