Иран „упати“ балистички ракети врз базата „Диего Гарсија“ на 4.000 километри растојание — нападот одбиен, но загриженоста расте

Иран лансираше две балистички ракети врз американско-британската воена база Диего Гарсија во Индискиот Океан, во напад што може да означи нова ескалација во војната. Иако нападот не успеа, тој предизвика сериозна загриженост во Вашингтон бидејќи покажува дека иранскиот ракетен дострел можеби е удвоен — на 4.000 километри.

Нападот не успеа, но пораката е јасна

Според американските претставници, првата ракета се расипала во летот и паднала во морето, додека втората ја соборил американски воен брод со системот СМ-3 — систем што уништува цели со чиста кинетичка сила, без експлозивна боева глава.

Се верува дека биле користени балистички ракети „Хоремшар-4″, кои носат боеви глави со тежина од повеќе од еден тон. Доколку се потврди дека можат прецизно да погодат цели на растојание од 4.000 километри, тоа значи дека и европски метрополи како Париз се на дофат на иранскиот ракетен арсенал, пишува „Тајмс оф Индија”.

Зошто е важна базата Диего Гарсија?

Диего Гарсија е изолиран остров во архипелагот Чагос, сместен на половина пат меѓу Источна Африка и Индонезија, и претставува една од најважните воени бази во светот.

• Во базата понекогаш се наоѓаат бомбардери способни да носат нуклеарно оружје
• Од таму американските бомбардери Б-2 ги започнаа првите воздушни удари врз Авганистан по 11 септември
• За време на „војната против теророт”, авиони беа испратени директно од островот во Авганистан и Ирак

Токму во петокот, Обединетото Кралство ја отстапи оваа база, заедно со базата Ферфорд во Англија, на САД за употреба за „специфични одбранбени операции против Иран”.

Дострелот на Иран — удвоен?

Овој напад го загрижи Вашингтон бидејќи Иран со години тврдеше дека максималниот дострел на неговите ракети е 2.000 километри. Нападот врз Диего Гарсија може да покаже дека тој дострел сега е удвоен.

Од друга страна, аналитичарите не исклучуваат можност овој обид да бил блеф на Револуционерната гарда, со цел САД да се доведат во сомнеж дека Иран поседува капацитет за кој претходно не се верувало.

Историја на островот

Архипелагот Чагос е последната колонија на Обединетото Кралство, одвоена од Маврициус во 1965 година. За да ја изградат воената база, Британците насилно отстранија околу 2.000 локални жители кон крајот на 1960-те. Островот им беше даден на САД со 50-годишен закуп во 1966 година, продолжен до 2036 година, а дополнителен 99-годишен закуп беше договорен во 2025 година.

Трамп најави можно намалување на операциите

Нападот се случи откако претседателот Доналд Трамп изјави дека размислува за постепено намалување на воените операции против Иран.

„Се приближуваме кон исполнување на нашите цели додека размислуваме за постепено намалување на нашите големи воени напори на Блискиот Исток во однос на иранскиот терористички режим”, изјави Трамп.