Зеленски најавува план за избори и референдум за мировен договор со Русија

Украинскиот претседател Володимир Зеленски има намера на 24 февруари да претстави план за одржување претседателски избори, кои би се спровеле истовремено со референдум за евентуален мировен договор со Русија, објави „Фајненшл тајмс“, повикувајќи се на украински и западни претставници запознаени со процесот.

Според информациите, граѓаните би се изјаснувале за евентуалниот договор со Москва паралелно со националните избори, а како можен термин за одржување на гласањето се споменува месец мај.

Минатата недела и „Ројтерс“ објави дека, според рамката што ја разгледувале американските и украинските преговарачи, секој мировен договор со Русија би бил ставен на одобрување пред украинските гласачи преку референдум.

„Фајненшл тајмс“ наведува дека подготовките во Украина веќе се започнати, иако засега нема официјална јавна потврда од кабинетот на Зеленски за конкретните чекори и временската рамка.

Овој потег би претставувал значаен политички чекор во услови на продолжен конфликт и сложени преговори за можен мировен исход.